ADVERTISEMENT
ഹരാരെ: ത്രിരാഷ്ട്ര ടി20 പരമ്പരയിലെ ദക്ഷിണാഫ്രിക്കയ്ക്കെതിരായ മത്സരത്തിൽ ന്യൂസിലൻഡിന് തകർപ്പൻ ജയം. ഹരാരെയിൽ നടന്ന മത്സരത്തിൽ ദക്ഷിണാഫ്രിക്കയെ 21 റൺസിനാണ് കിവീസ് തോൽപ്പിച്ചത്.
ന്യൂസിലൻഡ് ഉയർത്തിയ 174 റൺസ് പിന്തുടർന്ന ദക്ഷിണാഫ്രിക്കയ്ക്ക് 152 റൺസെടുക്കാനെ സാധിച്ചുള്ളു. 152 റൺസിൽ ദക്ഷിണാഫ്രിക്ക ഓൾഔട്ടാകുകയായിരുന്നു.
ഡിവാൾഡ് ബ്രെവിസിനും ജോർജ് ലിൻഡെയ്ക്കും മാത്രമാണ് ദക്ഷിണാഫ്രിക്കൻ നിരയിൽ തിളങ്ങാനായത്. ബ്രെവിസ് 35 റൺസും ലിൻഡെ 30 റൺസുമാണെടുത്തത്.
ന്യൂസിലൻഡിന് വേണ്ടി മാറ്റ് ഹെന്റിയും ജേക്കബ് ഡഫിയും മൂന്ന് വിക്കറ്റ് വീതമെടുത്തു. ഇഷ് സോദി രണ്ട് വിക്കറ്റും മിച്ചൽ സാന്റ്നർ ഒരു വിക്കറ്റും വീഴ്ത്തി.
ആദ്യം ബാറ്റ് ചെയ്ത കിവീസ് 20 ഓവറിൽ അഞ്ച് വിക്കറ്റ് നഷ്ടത്തിലാണ് 173 റൺസ് എടുത്തത്. അർധ സെഞ്ചുറി നേടിയ ടിം റോബിൻസണിന്റെയും വെടിക്കെട്ട് ബാറ്റിംഗ് പുറത്തെടുത്ത ബെവോൺ ജേക്കബ്സിന്റെയും മികവിലാണ് കിവീസ് മികച്ച സ്കോർ പടുത്തുയർത്തിയത്.
റോബിൻസൺ 75 റൺസാണ് എടുത്തത്. 57 പന്തിൽ ആറ് ബൗണ്ടറിയും മൂന്ന് സിക്സും അടങ്ങുന്നതായിരുന്നു താരത്തിന്റെ ഇന്നിംഗ്സ്. 44 റൺസാണ് ജേക്കബ്സ് എടുത്തത്.
ദക്ഷിണാഫ്രിക്കയ്ക്ക് വേണ്ടി ക്വെന മഫാക്ക രണ്ട് വിക്കറ്റെടുത്തു. ലുംഗ് എംഗിഡി, ജേറാൾഡ് കോട്സി, സെനുരൻ മുത്തുസ്വാമി എന്നിവർ ഓരോ വിക്കറ്റ് വീതം വീഴ്ത്തി.
സിംബാബ്വെയാണ് പരന്പരയിലെ മൂന്നാം ടീം. ആദ്യ മത്സരത്തിൽ ദക്ഷിണാഫ്രിക്ക സിംബാബ്വെയെ തോൽപ്പിച്ചിരുന്നു.
Tags :