കോഴിക്കോട് ജില്ലയിൽ ഇന്ന് (ജൂൺ 25, 2025) രാവിലെ മുതൽ ശക്തമായ മഴ തുടരുകയാണ്. കേന്ദ്ര കാലാവസ്ഥാ വകുപ്പ് ജില്ലയ്ക്ക് യെല്ലോ അലേർട്ട് പ്രഖ്യാപിച്ചിട്ടുണ്ട്. ആലപ്പുഴ, എറണാകുളം, തൃശൂർ, മലപ്പുറം, വയനാട്, കണ്ണൂർ, കാസർകോട് ജില്ലകളിലും ഇന്ന് യെല്ലോ അലേർട്ട് നിലവിലുണ്ട്. അടുത്ത 24 മണിക്കൂറിനുള്ളിൽ 6 മുതൽ 11 സെന്റിമീറ്റർ വരെ മഴ ലഭിക്കാൻ സാധ്യതയുണ്ടെന്നാണ് മുന്നറിയിപ്പ്.

മത്സ്യത്തൊഴിലാളികൾ കടലിൽ പോകരുതെന്നും മുന്നറിയിപ്പുണ്ട്. മണിക്കൂറിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ 60 കിലോമീറ്റർ വരെയും വേഗതയിൽ കാറ്റിനും സാധ്യതയുണ്ട്. ദുരന്ത നിവാരണ സേനയും സജ്ജമാണെന്നും അടിയന്തിര സാഹചര്യങ്ങൾ നേരിടാൻ എല്ലാ തയ്യാറെടുപ്പുകളും നടത്തിയിട്ടുണ്ടെന്നും ജില്ലാ കളക്ടർ അറിയിച്ചു.